Еңбектен – зейнетке

Асқар Есербаев 1962 жылы– Ералы ауылында дүниеге келді. Ауылдың қарапайым мектебінде білім алып, бойына адал еңбек пен қарапайымдықтың қасиетін сіңіріп өсті.

Жастайынан жұмысқа ерте араласып, «Маңғыстаумұнайгаз» бірлестігіне қарасты кәсіпорындарда плотник, токарь болып еңбек етті. Жоғары білімге деген ұмтылысы оны Алматыдағы политехникалық институтқа жетеледі. Мұнда бұрғылау ісін меңгеріп жүргенінде әскер қатарына шақырылып, Украина жерінде Отан алдындағы борышын абыроймен өтеп қайтты. Бұл кезең оның бойындағы тәртіп пен төзімділікті, шыдам мен шыншылдықты одан әрі шыңдай түсті.

1994-1995 жылдары мұнай базасында снабженец болып еңбек еткен Асқар Қонысбайұлы 1995 жылы Қаламқас кен орнына оралып, 3-мұнай-газ өндіру цехында оператор болып жұмысын бастады. Кейін 2-цехқа ауысып, осы бір күрделі де жауапты қызметте табаны күректей 30 жыл бойы аянбай тер төкті.

Өндіріс ауысымында күннің аптабына да, боран мен жауынға да мойымай, әр сәтін абыроймен өткерді. Қондырғы мен құбыр тілін жетік меңгерген, технологиялық процесті жүрекпен сезінетін нағыз шебер маманға айналды.

Асқар аға – тек өндірісте ғана емес, өмірде де өнегелі тұлға. Бес бірдей перзенттің әкесі, шаңырағының тірегі, жиендерінің арқа сүйер атасы. Еңбекқорлығы мен кісілігі арқасында әріптестерінің арасында зор құрметке ие болды.

Жас мамандарға білгенін үйретіп, әр қадамын ақылмен бағыттап, көпке үлгі бола білді. Бүгінде зейнеткерлікке абыроймен жеткен Асқар Есербаев – бір дәуірдің куәсі, бір саланың тірі шежіресі. Оның өнегелі еңбек жолы – Қаламқас мұнайының тамырын тереңге тартқан тарихының бір тарауы.